Clube Deportivo AS PONTES
C.D. AS PONTES - Historia

 

 

 

CLUB DEPORTIVO AS PONTES

 
 
ANTÓN FERREIRO
 
 
FUNDACIÓN E NOMES DO CLUB
 
         Anque o fútbol en As Pontes xa se practicaba dende os anos trinta (CLUB DEPORTIVO “PUENTES, de 1933 a 1960), non foi ata 1960 cando se federou o primeiro club da localidade. Foi o 28 de setembro dese mesmo ano cando pasa a denominarse  CLUB FÚTBOL CALVO SOTELO, nome da empresa de entón (electricidade, abonos e fertilizantes).
         O 12 de xullo de 1973 tomou a denominación de CLUB DEPORTIVO ENDESA, ó adquirir o complexo industrial a Empresa Nacional de Electricidad S.A. O 15 de decembro de 1982 engádeselle o nome da vila, CLUB DEPORTIVO ENDESA-AS PONTES, e o 9 de xuño de 2002 recupera o seu nome, CLUB DEPORTIVO AS PONTES. É un dos históricos do fútbol galego.
 
UNIFORMIDADE
 
         Nun principio a súa vestimenta oficial foi camisa branca e roxa a raias verticais, pantalón azul e medias roxas con volta de branco. Na temporada 1966/67 cámbiase pola de camisa e pantalón azuis e medias azuis con volta de cor branco.
         Na temporada 1983/84 a uniformidade oficial pasa a camisa azul, pantalón branco e medias azuis con volta de branco. Na temporada 2001/02, tómase como vestimenta a camisa roxa, pantalón azul escuro e medias roxas. Na temporada 2007/08 recupérase a vestimenta azul e branca.
 
PALMARÉS
 
         O máximo teito deportivo do club foi na temporada 1991/92 ó clasificarse en cuarta posición do grupo primeiro de Segunda División “B” e xogar a fase de ascenso a Segunda “A”. Foi campión de terceira división en dúas temporadas (1986/87 y 1994/95); en varias quedou subcampión, así como nos primeiros anos foi campión da primeira categoría rexional e subcampión galego de afeccionados en dúas ocasións.
         Ten no seu haber a copa de Galicia 1968 e participou nove temporadas na segunda división “B”, doce en terceira división e vintesete en categoría rexional.
 
 
 
 
 
         Nos seus corenta e oito anos de historia (de 1960/61 a 2007/08) disputou 1.772 partidos de competición oficial, dos que gañou 774, empatou 454 e perdeu 574, marcando 2.699 goles e recibido 2.174.
 
CAMPO DE XOGO
 
         Os primeiros encontros oficiais xogáronse no vello Campo da Feira, onde está hoxe o parque municipal e a casa do concello, pasando logo ó da “Academia”. Asiña pasou a xogar no novo campo do “POBOADO”, que ten unhas dimensións de 100 por 70 metros e unha capacidade para 3.000 espectadores (1.200 sentados). Ten pista para a práctica de atletismo. Ademais, hai cinco campos máis, todos de herba, onde xogan os equipos de base da entidade.
         Foi inaugurado o 18 de xullo de 1961 disputándose un partido amigable entre o Calvo Sotelo e o desaparecido Arsenal de Ferrol (2-1). Conta con alumeado artificial e estas instalacións deportivas están consideradas como unhas das mellores de Galicia. Como anécdota hai que sinalar que no Mundial 1966 de Inglaterra a selección española a piques estivo de facer a súa preparación en As Pontes, dadas as boas instalacións deportivas; pero, o non haber hoteis a selección fixo a preparación en Santiago.
         As oficinas do club están no propio campo. Dirección: Apartado postal nº 30, 15320 AS PONTES DE GARCÍA RODRÍGUEZ (A Coruña), teléfono/fax: 981.451068.
 
EQUIPOS DE BASE
 
         Unha das principais actividades do club é a de promocionar este deporte entre os rapaces. Dispón de equipos nas categorías pre-benxamín, benxamín, alevín, infantil, cadete exuvenil (que a pasada temporada estivo na División de Honra) que compiten nas primeiras categorías galegas, cun total de 150 rapaces, e que ano tras ano logran títulos de liga e copa. Este ano creouse o equipo feminino, que participa no grupo primeiro da liga galega.
 
PRESIDENTES
 
        O primeiro presidente do club foi Ramón Tobar Ochoa de Alda, que estivo as dúas primeiras temporadas (60/61 y 61/62). Seguiulle Fernando Alarcón Hernández (12 temporadas, desde 1962/63 a 1973/74)). En 1973 pasa a presidir a entidade Lucio Rubio de Antonio (1974/75), despois Juan Manuel Cabal García (1975/76 e 1976/77), Luis Soto Soria (tres, 1977/78 a 1979/80)), Ricardo Barredo González (catro, 1980/81 a 1983/84), Fermin Gil Alonso (tres, 1984/85 a 1987/88).
O desaparecidoConstantino Parajón Parajón, que con anterioridade fora vicepresidente, faise cargo da presidencia do club en 1988 (once temporadas e media en tres etapas, 1988/89 a 1991/92, 1993/94 a 1995/96 e 2000/01 ata maio de 2005). Francisco Dasilva Bello (cinco, 1992/93 e 1996/97 a 1999/00). Dende maio de 2005 é presidente Xaime Castro Paz.
 
RESUME POR CATEGORÍAS
 

CATEGORÍA
TEMPORADAS
SEGUNDA DIVISIÓN “B”
9
1987/88, 1988/89, 1989/90, 1990/91, 1991/92, 1992/93, 1995/96, 1996/97, 1997/98
TERCEIRA DIVISIÓN
12
1964/65, 1966/67, 1967/68, 1984/85, 1985/86, 1986/87, 1993/94, 1994/95, 1998/99,    1999/00,     2000/01,     2001/02
SERIE “A” REXIONAL
REXIONAL PREFERENTE
20
1960/61, 1961/62, 1962/63, 1963/64, 1965/66, 1968/69, 1969/70, 1970/71, 1971/72, 1973/74, 1974/75, 1981/82, 1982/83, 1983/84, 2002/03, 2003/04,   2004/05,     2005/06,    2006/07,     2007/08  
PRIMEIRA REXIONAL
3
1978/79, 1979/80, 1980/81
SEGUNDA REXIONAL
4
1972/73, 1975/76, 1976/77, 1977/78
TOTAL
48
TEMPORADAS

 
 
A VILA DE AS PONTES DE GARCÍA RODRÍGUEZ
 
As Pontes de García Rodríguez é unha vila de 10.210 habitantes (o concello ten 11.692 y 249 km2) que está situada ó NE da provincia da Coruña. Debe o seu nome ó seu fundador, o conde García Rodríguez de Valcárcel, que construíu en 1376 o castelo (hoxe desaparecido) e a ponte sobre o río Eume, á que se chamaría “Ponte de García Rodríguez”. De aí o seu nome actual.
É a capital da comarca do Alto Eume e os seus habitantes viven da agricultura e principalmente da industria. Nas proximidades da vila está o xacemento de carbón (lignito) a ceo aberto (que será pechado a finais de 2007) e a central térmica de 1400 MW de ENDESA (a súa cheminea ten unha altura de 356,60 metros). A finais deste ano entrará en funcionamento a nova central de ciclo combinado (gas) de 800 MW.
As Pontes está irmandada con LESNEVEN (Bretaña) dende 1991 e con CARMARTHEN-CAERFYRDDIN (Gales) e ARROYO NARANJO (Cuba), dende 2002. Tódolos anos realízanse encontros de cidadáns europeos, nos que hai conferencias, actos oficiais e actividades culturais e deportivas. Dende 1991 levan participado nestes encontros de cidadáns europeos máis de mil cincocentas persoas.
Ten unha intensa actividade cultural, deportiva e social, con cerca de cen asociacións e entidades. Son moi coñecidas as súas festas patronais no mes de xullo (Nª Sª do Carme e Santiago). A romaría da Fraga (25 de xullo, Día Nacional de Galiza) está declarada de interese turístico. O domingo de entroido celébrase a “Feira do Grelo” e o un de novembro a “Feira de Fungos e Cogomelos”. Son famosas os seus manteigados e polvoróns, doces típicos da comarca.
 
Outubro 2008
 




Comentarios hacia esta página:
Comentado por manu( manudb_putonolashotmail.com ), 03-06-2009, 22:52 (UTC):
digocho eu peo asta q cheguemos nos nada

Comentado por eu( gcwetohotmail.com ), 02-02-2009, 21:18 (UTC):
vai sendo hora de volver a terceira volver a 3º



Añadir comentario acerca de esta página:
Tu nombre:
Tu dirección de correo electrónico:
Tu página web:
Tu mensaje:

Hoy habia 4 visitantes¡Aqui en esta página!
=> ¿Desea una página web gratis? Pues, haz clic aquí! <=
Web oficial de C.D. As Pontes